واضح رہے کہ اگر کوئی شخص جان بوجھ کر کوئی ایسا کلمہ زبان سے کہہ دے جس کے اعتقاد سے کفر لازم آتا ہو، اور اس کو یقینی طور پر معلوم بھی ہوکہ یہ کلمہ کفر ہے تو اس سے وه دائره اسلام سے خارج ہوگا، اس لیے اس پرایمان اور نکاح کی تجدیدبھی لازم ہوگی۔ البتہ اگر کوئی شخص غلطی یا لاعلمی سے کفریہ کلمہ زبان سے ادا کرے اور اسے یہ علم نہ ہوکہ ایسے کلمات سے انسان کافر ہوجاتاہے، تو اس صورت میں وہ کافر نہیں ہوگا۔

لہٰذا صورت مسئولہ میں اگر واقعی سائل نے نادانی اور لاعلمی میں یہ جملہ ”سیتا مہا دیوا“ (وفاداری اور قربانی کی عظیم دیوی) کہا ہو، اورسائل کا مقصد اس سے کسی شرکیہ عقیدہ کا اقرار نہ ہوبلکہ محض حکایۃ ًیہ جملہ اس کے زبان پر آگیا ہو، تواس سے وہ دائرہ اسلام سے خارج نہیں ہوا، تاہم آئندہ اس قسم کے کلمات سے اجتناب کرے، اور احتیاطاً توبہ واستغفار بھی کرے۔

وأما الجاهل إذا تكلم بكفر ولم يدر أنه كفر اختلفو فيه، قال بعضهم: لا يكون كفرا ويعذر بالجهل، وقال بعضهم: يصير كافرا ولا يعذر بالجهل.(الفتاوى الهندية، كتاب السير، باب مايكون كفرا من المسلم وما لا يكون، ج:9، ص:425)

وما كان في كونه كفرا اختلاف يؤمر قائله بتجديد النكاح والتوبة احتياطا، وما كان خطأ لا يؤمر إلا بالاستغفار والرجوع عنه. (الفتاوى البزازية، كتاب الفاظ تكون إسلاما،أوكفرا، أو خطأ، الفصل الثاني فيما يكون كفرا من المسلم وما لا يكون، ج:3، ص:179)