بعض لوگ یہ کہتے ہیں کہ ایک گھنٹہ اور پندرہ منٹ یعنی 75 منٹ کا فاصلہ ہے اور یہ فاصلہ ہر موسم میں یہی متعین ہے گویا تاقیام قیامت یہی مسئلہ ہے اور بس اور اسی طرح قریب قریب رائے فتاویٰ فریدیہ اور فتاویٰ حقانیہ کے بعض فتاویٰ کی عبارات سے بھی مترشح ہے کہ 75منٹ کا فاصلہ پایا جاتا ہے گو احتیاط کی بات بھی لکھ دی ہے کہ احتیاطاً اس سے زیادہ مقدار پر نماز کھڑی کردی جائے اور فتاویٰ حقانیہ میں ایک جگہ لکھا ہے کہ مقدار کی کوئی تحديد نہیں، البتہ مغرب کی اذان کے بعد سوا گھنٹہ (75 منٹ) بعد عشاء کی اذان دینی چاہیے، لیکن فتاویٰ حقانیہ کی یہاں والی بات بھی مطلق ہے کہ بس اذان دینی چاہیے، چاہے جو بھی موسم ہو، جبکہ اکثر علماء محققین اور ملک کے نامور مفتیان کرام کی تحقیق یہ ہے کہ یہی مذکورہ بالا مقدار موسموں کی تبدیلی کی وجہ سے تبدیل ہوجاتی ہے۔ موسم گرما اور سرما اور درمیان میں یہی مقدار یکساں نہیں رہتی عموماً موسم گرما میں یہی مقدار زیادہ ہوجاتی ہے زیادہ سے زیادہ ایک گھنٹہ 35، بلکہ 38 یا 39 منٹس تک یعنی 95 وغیرہ منٹس تک بھی پہنچ جاتی ہے اور کم بیش بھی ہوجاتی ہے کم سے کم مقدار عمومی طور پر موسم سرما میں ایک گھنٹہ پندرہ منٹ تک اور کم وبیش ہوجاتی ہے۔ بہرصورت یہی 75 منٹ مقدار متعین ومحدود ہر موسم میں نہیں  اور اس رائے پر اکثر  فتاویٰ جات فتاویٰ دارالعلوم دیوبند وغیرہ دال ہیں اور آج کل کے بڑے دارالافتاء کراچی اور باہر کے علماء اور ماہرین فلکیات کی بھی یہی تحقیق ہے کہ یہ جو 15درجہ یا 18 درجہ کا قول ہے اکثر نے 18 درجہ پر فتویٰ جاری کیا ہے اور اہل تحقیق اور ماہرین فلکیات نے اسی 18 درجہ کی تحقیق کو درست پایا ہے۔باقی مزید مفتی بہ قول آپ مفتیان کرام سے مطلوب ہے گو اس کا تعلق مشاہدہ سے ہے اور سابقہ تفصیل اور موجودہ علماء کرام ومفتیانِ عظام اور ماہرین فلکیات کے تجربات ومشاھدات کی بناء پر جو آج کل رائج نقشہ جات ہیں ان میں بھی وقت عشاء تاخیر سے داخل ہونے کا لکھا جاچکا ہے اور ان میں بھی ایسا نہیں ہے کہ ہر ماہ میں یہی 75 متعین منٹس درج ہیں بلکہ موسم اور ایام کی تبدیلی کی وجہ سے الگ الگ اوقات درج ہیں،  اس سے بھی یہی معلوم ہوتا ہے کہ مفتی بہ قول شفق ابیض ہے نہ کہ شفق احمر اور شفق ابیض کی غیبوبت پر عشاء کا وقت داخل ہونا امام اعظم ابو حنیفہ رحمہ اللہ تعالیٰ کا قول بھی ہے جوکہ احوط ہے اور سابقہ رائج نقشے جوکہ مفتیان کرام اور ماہرین کی نگرانی میں مرتب کیے گئے ہیں، ان سے مفتی بہ قول أمام ابو حنیفہ رحمہ اللہ کا معلوم ہوتا ہے کہ شفق ابیض کی غیبوبت پر وقت عشاء داخل ہوجاتا ہے جبکہ صاحبین کے قول کے مطابق شفق احمر پر، تقریباً 12 منٹ کا فرق ہے جبکہ صحیح قول کے مطابق مابین المغرب والعشاء والا فاصلہ جس دن ہوتا ہے اسی دن صبح صادق اور طلوع شمس کے مابین بھی ہوتا ہے اور ظاہر ہے کہ وہی فاصلہ بھی ہر موسم میں 75 منٹ نہیں ہے۔

اور ہر موسم میں اس فاصلہ کو یکساں قرار دینے کی صورت میں خصوصاً رمضان المبارک کی سحری کے بعد طلوع فجر کے بعد بھی یہی مسئلہ ہوگا کہ 75 منٹ کو تاقیام قیامت قرار دینے کی صورت میں عند البعض سحری بند کرنے اور عند البعض سحری جاری رکھنے اور کھانا پینا جاری رکھنے کا اختلاف ومسئلہ بھی پیش ہوگا۔ باقی امام صاحب کا قول اور درجہ 18 کاقول لینے میں احتیاط بھی ہے اور استحباب بھی ہے بہ نسبت صاحبین کے قول کے، جبکہ مذکورہ تفصیل بالا کی بناء پر فتویٰ تو امام اعظم ابو حنیفہ رحمہ اللہ کے قول پر معلوم ہوتا ہے اور عشاء کو تو اگر ہم ابتدائی ثلث تک جوکہ وقت مستحب ہے مؤخر نہیں کرسکتے تو کم از کم امام اعظم ابو حنیفہ رحمہ اللہ کے مسلک کے مطابق قول سے مؤخر تو نہیں کرنا چاہیے۔

البتہ علامہ حصکفی رحمہ اللہ نے الدرالمختار میں اور علامہ شامی رحمہ اللہ نے فتاویٰ شامی میں اور اسی طرح شرح وقایہ میں مجمع علیہ اور مفتی بہ قول صاحبین کا لکھا ہوا ہے۔

اب اس بارے میں ہم بھی متحیر ہیں کہ کس قول کو لیا جائے، دارالعلوم دیوبند اور دیگر دارالافتاء اور فتاویٰ جات سے اور نقشہ جات سےتو تاخیر والا وقت معلوم ہوتا ہے جبکہ صاحبین کے قول کے مطابق تو جلدی وقت داخل ہوجاتا ہے تو ہم کس پر عمل کریں کیا یہ نقشہ جات اور اکثر فتاویٰ جات وعلمائے کرام وماہرین فلکیات کی بات غلط ہے کیا؟ اور بعض نقشوں میں تو دو وقت لکھے گئے ہیں ایک شفق احمر کے حساب سے اور دوسرا شفق ابیض کے حساب سے، عام طور پر شفق ابیض کے حساب سے لکھے ہوئے وقت کے مطابق یہاں اکثر مساجد میں اذانیں اور نماز عشاء ادا کی جاتی ہے۔

مذکورہ کچھ مختصر معروضات اس لئے پیش کئے تاکہ ان تمام باتوں کو ملحوظ نظر رکھتے ہوئے ہماری راہنمائی فرمائیں تاکہ ہمارے عوام کے لئے یہ مسئلہ ہموار ہوجائے اور عبادات کے اندر کوئی خلل نہ آئے۔ شریعت مطہرہ کی رو سے اس مسئلے میں ہماری راہنمائی فرما کر ایک ایسا مستحکم جواب و فتویٰ صادر فرمائیں تاکہ اس پر تمام لوگ یکساں طور پر عمل پیرا رہیں اور اسی قول کو لے کر عمل کیا کریں اور یہ بتائیں کہ 75 منٹ کی تحديد ہر موسم میں ہے؟ یا گرمیوں میں فاصلہ اس سے بھی زیادہ ہوجاتا ہے۔ مفتی بہ قول کی نشاندبہی کیجئیے گا۔