قرآن کریم کی تلاوت اگر ایصالِ ثواب کی غرض سے کی جائے تو اس کے بعد بہ طور معاوضہ کھانا کھانا یااس پر اجرت لینا جائز نہیں ،تاہم اگر کسی جگہ اجرت کے بجائے محض اکرام اور ہدیہ کے طور پر ایصالِ ثواب کی خاطر تلاوت کرنے والوں کو کچھ کھلایا پلایا جائے تو اس کی گنجائش ہے۔

صورت مسؤلہ کے مطابق ہمارے عرف میں چونکہ تلاوت کرنے والوں کو محض اکرام اور ہدیہ کے طور پر کھانا کھلایا جاتا ہے، لہذا اس کے کھانے میں شرعاً کوئی قباحت نہیں ۔ البتہ اگر کسی جگہ باقاعدہ عقدِ اجارہ ہوتا ہو اور اجرت کے طور پر کھانا کھلایا جاتا ہو تو اس کا کھانا جائز نہیں۔

جہاں تک سوال میں مذکور روایت کا تعلق ہے تو حضرت مولانا محمد زکریا ؒ خود تشریح میں فرماتےہیں کہ:"یعنی جو لوگ قرآن شریف کو طلب دنیا کی غرض سے پڑھتے ہیں، ان کاآخرت میں کوئی حصہ نہیں۔۔۔"نیز فرماتے ہیں:"یہاں پہنچ کر میں ان حفّاظ کرام کی خدمت میں جن کا مقصود قرآن شریف کے مکتبوں سے فقط پیسہ ہی کمانا ہے، بڑے ادب سے عرض کروں گا کہ للہ اپنے منصب اور اپنی ذمہ داری کا لحاظ کیجئے۔۔۔" اس سے معلوم ہوا کہ اس روایت میں ان لوگوں کے لیے وعید ہے جو طلب دنیا کی خاطر قرآن کی تلاوت کررہے ہوں اور ان کا مقصد بھی یہی ہو کہ قرآن کے ذریعے دنیاوی مفادات حاصل کریں۔

"ولا يصح الاستئجار على القراءة وإهدائها إلى الميت لأنه لم ينقل عن أحد من الأئمة الإذن في ذلك ۔۔۔فالحاصل أن ما شاع في زماننا من قراءة الأجزاء بالأجرة لا يجوز لأن فيه الأمر بالقراءة وإعطاء الثواب للآمر والقراءة لأجل المال فإذا لم يكن للقارىء ثواب لعدم النية الصحيحة فأين يصل الثواب إلى المستأجر."(ردالمحتار علی الدرالمختار، کتاب الإجارۃ،ج:9،ص:77)

"(وقال الشعبي لا يشترط المعلم إلا أن يعطى شيئا فليقبله)۔۔۔۔ وقول الشعبي هذا يدل على أن أخذ الأجر بالاشتراط لا يجوز فإن اعطى من غير شرط فإنه يجوز أخذه لأنه إما هبة أو صدقة وليس بأجرة وأصحابنا الحنفية قائلون بهذا."(عمدۃ القاری، باب مایعطی فی الرقیۃ علی إحیاءالعرب بفاتحۃ الکتاب، ج:12، ص:97)