جامعہ کےایک فتوے بعنوان"قفیز الطحان کی جنس کے معاملات میں عرف کی وجہ سے جواز کا قول"میں بندے کو کچھ تردّد اورشبہے کا ازالہ کرنا مقصود ہےاور وہ یہ کہ جواب میں قفیزالطحان والی روایت کے متعلق کچھ یوں لکھا ہے کہ:

"قفیز الطحان والی روایت کی سندمیں محدثین نے کلام کیا ہے،چنانچہ ابن حجر ؒنے اس حدیث کومنكرقرار دیا ہے اور فرماتے ہیں کہ:"هذامنكر،وراويه لايعرف"(لسان المیزان،ج:6، ص:198)،اسی طرح الشرح الکبیر(ج:5، ص:194)میں مذکور ہے کہ:"وهذا الحديث لا نعرفه ولم تثبت صحته" یعنی یہ حدیث پایہ ثبوت کو نہیں پہنچتی۔تو اس کی سند کے متکلم فیہ ہونے کی وجہ سے اس کا رسول اللہﷺ سے منقول ہونا بھی مشکوک ہے،اسی طرح بعد میں لکھاہے کہ:"قفیز الطحان والی روایت معلول اور متکلم فیہ ہے"۔

اب اس روایت کی سند میں ایک راوی "ہشام" اگرچہ ابن حجر وغیرہ کے نزدیک متکلّم فیہ ہے لیکن اعلاءالسنن میں اس کو ثقات میں شمار کیا ہے، اس سے معلوم ہوا کہ ہشام کو بعض نے ثقات اور بعض نے متکلّم فیہ قرار دیا ہے، اور جب ایک راوی کے بارے میں جرح اور تعدیل باہم متعارض ہواور دونوں مبہم ہو تو تعدیل کو مقدم کیا جائے گا، اسی طرح اگر جرح مبہم ہواور تعدیل مفسر ہو تو بھی تعدیل کو مقدّم کیا جائے گا، اس لیے تعدیل کو مقدّم کرنا چاہیے، دوسرا یہ کہ اگر کسی راوی کےمتعلق جرح اور تعدیل دونوں موجود ہوتو دونوں کو نقل کرنا چاہیے، فقط جرح کو نقل کرکے تعدیل کو چھوڑنا درست نہیں، تیسرا یہ کہ یہ حدیث مبارکہ اگرچہ ہشام والے سند سے متکلّم فیہ ہے لیکن اس حدیث کو اورسند کے ساتھ بھی نقل کیا گیا ہےجس میں کسی کا کلام نہیں، لہذا فقط متکلّم فیہ راوی والے سند کی وجہ سے حدیث مبارکہ کو مشکوک قرار دینا درست نہیں۔