بِسْمِ اللَّهِ الرَّحْمَنِ الرَّحِيم
| لاگ ان | 02/11/2026 |
دارالافتاء
ایک بھائی کا دوسرے بھائی کو زمین بیچتے وقت پابند بنانا
سوال
ایک شخص اپنی ذاتی زمین دس لاکھ پر فروخت کرنا چاہتا تھا تو اس کا بھائی اس سے کہتا ہے کہ آپ اپنی زمین دس لاکھ میں کسی اور پر مت بیچو، میں نے کسی اور سے بات کی ہے بارہ لاکھ میں آپ کی زمین اس کو فروخت کرتا ہوں،فروخت کرنے کے بعد دس لاکھ آپ کے ہوں گے اور دو لاکھ میرے ، اگر آپ میری بات نہیں مانتے ہو تو آپ یہ زمین فروخت نہیں کر سکتے،آیا اس بھائی کا اس طرح شرط لگانا جائز ہے یا نہیں؟
جواب
شریعت مطہرہ کی رو سے ہر شخص کو اپنی ملکیت میں اپنی صوابدید کے مطابق جائز تصرف کا مکمل اختیار حاصل ہے ، کسی دوسرے کو اس کی ملکیت میں تصرف کا اختیار حاصل نہیں اور نہ دوسرا کوئی کسی کو تصرف کا پابند بنا سکتا ہے ۔
صورت مسؤلہ کے مطابق کسی شخص کا اپنے بھائی کو پابند بنانا کہ وہ اس کی بات مان کر اس کی مرضی کے مطابق زمین فروخت کرے، اگر اس کی مرضی کے مطابق فروخت نہیں کرتا تو بیچنے کی اجازت نہیں ،شرعاً کسی پر اس طرح بلاوجہ پابندی لگانا جائز نہیں ۔
للمالك أن يتصرف في ملكه أي تصرف شاء سواء كان تصرفا يتعدى ضرره إلى غيره أو لا يتعدى.(بدائع الصنائع، كتاب الدعوى، فصل في أحكام الملك والحق الثابت في المحل، ج:8، ص:509)
كل يتصرف في ملكه كيف شاء.(شرح المجلة،الباب الثالث:في بيان المسائل المتعلقة بالحيطان الخ، الفصل الاول، ج:4، ص:132)