واضح رہے کہ نماز ِجمعہ کے وجوب ِادا کی شرائط میں سے ایک شرط یہ ہے کہ جہاں نماز ِ جمعہ ادا ہوتی ہے وہ جگہ شہر ہویا توابع ِشہر میں سے ہو یا بڑا گاؤں ہو۔ بڑے گاؤں کی تعریف فقہائے کرام ؒ نے اپنے اپنے وقت میں حالات کے مطابق مختلف عبارات سے کی ہے۔ موجودہ دور میں جس گاؤں کی آبادی دو ڈھائی ہزار افراد پرمشتمل ہواور روز مرہ کی ضروریات اس میں میسر ہوں وہ بڑا گاؤں شمار ہوگا۔ اور توابع ِ شہر سےشہر کے مضافات میں واقع وہ آبادی مراد ہے جو مستقل گاؤں نہ ہو بلکہ عرف میں شہر  کے تابع شمار کی جاتی ہو، چنانچہ جو آبادی شہر سے باہر ہو اور مستقل گاؤں کی حیثیت رکھتی ہو اورعرف میں بھی وہ مستقل گاؤں شمار کی جا تی ہوتو اگر وہ خود بڑا گاؤں نہ ہو تو اس میں نماز ِجمعہ جائز نہیں۔

 صورت مسئولہ  میں بیان کردہ حالات سے یہ  واضح  نہیں  ہو رہا کہ رغزی اور کوڑوی کلہ دونوں ایک ہی گاؤں ہے یا دونوں الگ الگ حیثیت رکھتے ہیں اس لیے کوئی رائے قائم نہیں کی جاسکتی، تاہم  وہاں کے مقامی علماء  کرام ومفتیان  حضرات  سے  اس سلسلے میں  رائے طلب کی جائے، کیونکہ وہ اس گاؤں کی حیثیت  سے بہتر واقف ہوں گے۔

( ويشترط لصحتها ) سبعة أشياء الأول ( المصر...أو فناؤه ) بكسر الفاء (وهو ما) حوله (اتصل به) أولا (لأجل مصالحه) كدفن الموتى وركض الخيل والمختار للفتوى تقديره بفرسخ.(الدر المختار،كتاب الصلوة، باب الجمعة،ج:1،ص:109)

وتقع ‌فرضا في القصبات والقرى الكبيرة التي فيها أسواق.(رد المحتار على الدر المختار، باب  الجمعة،ج:2،ص:138)

العادة محكمة يعني أن العادة عامة كانت أو خاصة تجعل حكما لإثبات حكم شرعي... والعرف والعادة إنما تجعل حكما لإثبات الحكم الشرعي إذا لم يرد نص في ذلك الحكم المراد إثباته.(درر الحکام ،المادة: 36،ج:1،ص:40)