میری بیوی نے خلع کےلیے عدالت میں مقدمہ دائر کیا تھا،مقدمہ میں مجھ پرجھوٹے الزامات لگائے گئے تھے کہ میں تشدد کرتا ہوں، اپنی بیوی کو نان نفقہ ادانہیں کرتا، اور حق مہر بھی ادا نہیں کیا۔جب عدالت کا نوٹس مجھے ملا تو میں عدالت میں پیش ہوا اور تحریری جواب بذریعہ وکیل جمع کروایا۔ جس میں ان الزامات کی سختی سے تردید کرتے ہوئے انہیں جھوٹ اور لغو پر مبنی قرار دیا۔ان سے اپنے دعوے کے حق میں  ثبوت یا گواہی طلب کی جو وہ پیش نہ کرسکی۔ اصل حقائق عدالت میں تحریری شکل میں جمع کروا دیے۔ عدالت کی طرف سے دی گئی تاریخ کے مطابق میں اور میری بیوی عدالت میں پیش ہوئے،میری بیوی نے جج سے کہا کہ میں ان کے ساتھ نہیں رہنا چاہتی ، یہ مجھےمینٹلی ٹارچر کرتاہے،اس لیے مجھے خلع چاہئے ۔جج نے مجھ سے سوال کیا آپ کیاچاہتے ہیں؟ میں نے کہا میں اپنی بیوی کو رکھنا چاہتا ہوں، اور میں نہیں چھوڑنا چاہتا ، ہمارے تین چھوٹے چھوٹے بچے ہیں، ہماری علیحدگی سے ان کی نفسیات پربہت برا اثر پڑے گا،ان سے پوچھئے میری کس بات سے ان کو مینٹل ٹارچر ہوتا ہے؟ یوںمن گھڑت الزام نہ لگائے۔ مجھ پر مقدمہ میں جوالزامات لگائے گئے ہیں، وہ سب جھوٹے اور حقائق کے منافی ہیں۔میں نے کبھی مار پیٹ نہیں کی،نان نفقہ کی ذمہ داریاں بھی بھرپور اور بروقت اداکیں، اور حق مہر بھی ادا کیا ہے۔ آپ ان سے پوچھ لیجیے کیا میں غلط کہہ رہا ہوں؟ جج صاحب نےمیری بیوی سے پوچھا کیاآپ کو حق مہر ملا ہے؟ جس پر اُس نے اقرار کیا کہ جی ہاں اسے حق مہر کی مدمیں 50000 روپے ملے تھے۔پھر جج نے میری بیوی سے پوچھا کیا آپ اپنے شوہر کے ساتھ رہنا چاہتی ہیں؟ میری بیوی نے منع کر دیا۔پھر جج نے مجھ سے دوبارہ پوچھا کیا آپ رکھنا چاہتے ہیں؟ میں نے کہا جی میں رکھنا چاہتا ہوں،میں بالکل نہیں چھوڑنا چاہتا۔ اس سے تو میرے تین بچوں کی زندگی بھی خراب ہو جائےگی،یہ مجھے اصل مسئلہ بتائےاور وجہ جاننا میرا حق ہے، اگر واقعی میرا کوئی قصور ہے تو میں اس کا ازالہ کرنے کو تیار ہوں۔ جس پر میری بیوی خاموش رہی، اور پھر جج نے میری بیوی کے والدسے پوچھا کیا یہ دونوں ساتھ رہ سکتے ہیں، جس پر انھوں نے صاف انکار کر دیااور میرے انکار اور بارہا منع کرنے کے باوجود جج نے کوئی مصالحتی موقع دیے بغیر میری بیوی کو خلع کی ڈگری جاری کر دی، میں نے بھری عدالت میں سب کے سامنے اپنی بیوی کو کہا، یہ فیصلہ میری مرضی کے خلاف ہےاور میں اس نکاح کو ختم کرنے پر تیار نہیں ہوں۔عدالت نے یکطرفہ طور پر خلع کا حکم جاری کر دیا، اور میری بیوی کو حکم دیا کہ حق مہر کی رقم 50000 روپے عدالت میں جمع کرائے۔میں نے حق مہر کی رقم وصول نہیں کی، اور نہ میرا یہ وصول کرنے کا ارادہ ہے،کیونکہ میں نہ تو اس خلع کے حق میں ہوں اور نہ ہی نکاح ختم کرنا چاہتا ہوں۔ براہ کرم مجھے بتائیں خلع ہوئی ہےیا نہیں؟کیا میری بیوی ابھی بھی میرے نکاح میں ہے یا نہیں؟