فقہاے کرام ؒ کی تصریحات کے مطابق کسی ایک شخص کو اتنی زکوۃ دینا جس سے وہ صاحب ِ نصاب  ہو جائے مکروہ ہے  لہذا مستحق کو نصاب کی مقدار میں زکوۃ نہ دی جائے ،البتہ اگر کوئی مستحق ِزکوۃ  قرض دار ہو  یا  اس کے اہل و عیال زیادہ ہوں یا اس کو کوئی اور ضرورت   در پیش ہو جس کو پورا کرنے کے لیے زیادہ رقم کی ضرورت ہو  تو  اس کو مد نظر رکھ کر نصاب کے برابر یا اس سے زیادہ   رقم دی جا سکتی ہے ۔

            صورت مسؤلہ کے مطابق اگر مختلف افراد کسی شخص کے تبلیغی سفر کے لیے آپس میں زکوۃ کی رقم جمع کر کے اس کو حوالہ کریں اور وہ رقم نصاب سے زیادہ ہو تو ایسی صورت میں اگر اس شخص کی ضرورت  مثلاً ویزہ  ،ٹکٹ ،اخراجات وغیرہ  اس  رقم کے حصول کے بغیر ممکن نہ ہو تو اس کو نصاب کے بقدر یا اس سے زیادہ رقم دینے میں کوئی مضائقہ نہیں اور زکوۃ ادا ہو جا ئے گی ۔

ويكره أن يدفع إلى رجل مائتي درهم فصاعدا، وإن دفعه جاز كذا في الهداية. هذا إذا لم يكن الفقير مديونا فإن كان مديونا فدفع إليه مقدار ما لو قضى به دينه لا يبقى له شيء أو يبقى دون المائتين لا بأس به، وكذا لو كان معيلا جاز أن يعطى له مقدار ما لو وزع على عياله يصيب كل واحد منهم دون المائتين۔(الفتاوى الهندية،الباب السابع في المصارف ،ج:1 ،ص:188)