واضح رہے کہ میاں  بیوی کے ازدواجی تعلقات قائم ہونے کے بعد اگر شوہر باوجود قدرت کے بیوی کے حقوق اور نان نفقہ وغیرہ کی ادائیگی سے انکار کرے جس کی وجہ سے عورت کے لیے خاوند کے ساتھ زندگی گزارنا مشکل ہو جائےتو ایسی صورت میں اصل حکم تو یہ ہے کہ عورت شوہر کو طلاق یا خلع پر راضی کرکے اس سے چھٹکارا حاصل کرے تاہم اگر شوہر نہ حقوق ادا کررہا ہو اور نہ ہی طلاق یا خلع پر راضی ہوتا ہو تو ایسی صورت میں یہ شوہر متعنت کہلاتا ہے ، اور متعنت کی بیوی کو مسلمان حاکم/عدالت کی طرف رجوع کرنے کا حق حاصل ہے ، بشرطیکہ یہ عورت عزت وآبرو کا لحاظ رکھتے ہوئے کسب معاش پر قدرت نہ رکھتی ہو، یا نفقہ پیدا کرنے کی قدرت تو ہو، لیکن شوہر سے علیحدہ رہنے کی صورت میں گناہ میں مبتلا ہونے کا خدشہ ہو ، ایسی صورت میں عدالت مکمل تحقیق کرے اگر عورت شوہر کے ظلم وستم کو ثابت کرے تو عدالت شوہر کو حکم دے کہ یا تو بیوی کو صحیح طریقے سے آباد کرےیا طلاق دے دے۔ اگر وہ صحیح طریقے سے بیوی کو اپنے پاس رکھنے پر آمادہ ہوجائے تو ٹھیک اور اگر انکار کرے یا عدالت کا نوٹس اور سمن ملنے کے باوجود عدالت میں شوہر یا اس کا وکیل حاضر نہ ہو  اور بیوی بہر صورت اس کی زوجیت سے نکلنا چاہتی ہوتو تب عدالت عورت کو تنسیخ نکاح کی ڈگری دے سکتی ہے ، اور یہ تنسیخ شرعاً معتبر ہوگی اور عدت گزرنے کے بعد یہ عورت دوسری جگہ نکاح کرسکتی ہے ۔

            صورت مسئولہ کے مطابق اگر مذکورہ عورت کی طرف سے عدالت میں دائر کردہ درخوست اور عدالتی فیصلہ میں ذکر شدہ تفصیلات  حقیقت پر مبنی ہوں یعنی واقعی شوہراس پر ظلم وستم کرتا رہا ہواور اس کو بلا وجہ گھر سے نکال دیا ہو اور  نان نفقہ بھی  نہ دیتا ہو،  نیز نوٹس ملنے کے باوجود وہ بغیر عذر کے  عدالت میں حاضر نہ ہوا ہو  تو ایسی صورت میں  عدالت کا فسخ نکاح کا فیصلہ شرعاً معتبر ہے۔

وأما المتعنت الممتنع عن الإ نفاق ،ففي مجموع الأمير ما نصه :إن منعها نفقة الحال،فلها القيام،فإن لم يثبت عسره أنفق،أو طلق،وإلاطلق عليه۔قال محشيه :(وإلاطلق) أي عليه الحاكم من غير تلوم ۔(الحيلة الناجزة ، ص: (133