شرعی نقطہ نظر سے متوفی جو مال وجائیداد چھوڑجائے  اس کے ساتھ   چار حقوق متعلق ہوتے ہیں ، سب سے پہلے ترکہ سے تجھیز وتکفین اور دفن کا انتظام کرنا ضروری ہے ، اس کے بعد جو مال بچ جائے اس سے  سب سے پہلے وہ دین اور قرض جو میت کے ذمہ لازم تھا وہ ادا کیا  جائے گا ،اس میں بیوی کا حق مہر بھی داخل ہے اگر وہ زندگی میں ادا نہ کیا ہو ۔ اور اگر متوفی نے کوئی وصیت کی ہو تو قرض کی ادائیگی کے بعد بچ جانے والے مال کے ایک تہائی حصہ میں وصیت   نافذ کی جائےگی ، اب اس کے بعد جو مال بچ جائے تو میت کے ورثا میں ضابطہ میراث کے  تحت تقسیم کیا جائے گا۔

صورت مسؤلہ میں اگر بیوہ (بشری) نے اپنا مہر مورث (احمد ) سے اس کی زندگی میں وصول  نہیں کیا  تھا اور نہ ہی معاف کیاتھاتویہ اس  کے ذمہ دین ہے اور دین کا ادا کرنا تقسیم میراث پر مقدم ہے  اس لیے ضروری ہے کہ پہلے  مرحوم کے تمام متروکہ مال وجائیداد سےمہر ادا کیا جائے اور اگر پھر بھی پورا  نہ ہو تو یہ اس کے ذمہ قرض رہے گا کسی اور رشتہ دار (باپ ، بھائی وغیرہ) سےاس کا مطالبہ نہیں کیا جاسکتا ۔

تتعلق بترکۃ المیت حقوق اربعۃ مرتبۃ ، الاول یبدء بتکفینہ وتجھیزہ من غیر تبذیر ولا تقتیر ثم تقضی دیونہ من جمیع ما بقی من مالہ ثم تنفذ وصایا ہ من ثلث ما بقی بعد الدین ثم یقسم الباقی بین ورثتہ۔(السراجی فی المیراث  ص5)